Ginpatuman eon ro mas hugot ag striktong implementasyon it curfew sa mga pamatan-on sa banwa it Kalibo.
Suno kay Kagawad Kim Melgarejo it Poblacion, Kalibo nga ro pagstrikto hay bukon eamang it para sa mga gustong manggulo kundi para sa tanan nga mga pamatan-on agud nga malikawan nga maaresto ro mga raya ag uman nga maipaatubang sa barangay ag sa taeatapan it akalde it banwa.
Ginpahayag dugang nga ro mga pamatan-on nga may event sa eskwelahan nga abuton it dis oras it gabie hay libreng makipag-coordinate sa andang taeatapan para sa masayuran nanda nga may nagakaigong rason ro andang pagpabilin sa guwa it andang panimaeay sa oras it curfew implementation.
Ro mga madakpan hay igaturn-over sa natungdan nga ahensya kon sa siin ipatawag man ro andang mga ginikanan.
Madumduman nga ginpatawag ro mga grupo it pamatan-on kaibahan ro andang mga ginikanan kon sa siin nagpanumpa ro mga raya nga inde eon magkriar it gulo sa banwa.
Raya hay kasunod sa insidente it pagpamana kon sa siin daywa ro nabiktima ag ro suspek hay dati eon man nga naimbolbar sa pila ka mga krimen.
