KALIBO, Aklan—Ginpasiguro it Department of Education (DepEd)-Aklan nga magapadayun ro implementasyon it blended learning sa bilog nga probinsya sa pihak it padayun nga paglobo it mga bag-ong kaso it COVID-19.
Suno kay Dr. Miguel Mac Aposin, Schools Division Superintendent it DepEd-Aklan nga ginpundo eon ro pagpatigayun it pilot implementation it limited face to face classes matapos nga ginpaidaeom sa Alert Level 3 ro Aklan.
Tuyo eamang kara nga protektahan ro kaeuwasan it mga estudyante, ginikanan, manugturo ag iba pang empleyado it eskwelahan sa paeag it COVID-19.
Madumduman nga tatlong ka mga eskwelahan sa Aklan ro ginpasugtan it DepEd nga magpatigayun it limited face to face classes nga ginakaeakipan it Laserna Integrated School, Banga Elementary School ag Malinao Schools for Philippine Craftsmen.
Gindayaw man ni Dr. Aposin ro hugut nga koordinasyon it bilog nga komunidad para maayos nga maipatigayun ro pagbalik sa eskwelahan it pilang ka mga learners.
Owa man sigon it anumang insidente nga nailista kamana man nga owa it estudyante ag manugturo nga nagpositibo sa deadly virus.
Sa pihak nga parte, nakataeana eon nga magtapos ro 2nd grading period sa mga eskwelahan ag sa pagtapos it eksaminisyon hay makaangkon it sang dominggo nga break ro mga estudyante.
