KALIBO, Aklan—Masayadong maeuya ro pag-implementar ag pag-administrar it bakuna kontra sa COVID-19 sa pilang ka mga estado it United States of Amerika.
Suno kay Bombo International Correspondent Cha Reyes it Virginia, USA nga sa 385, 000 doses it bakuna nga nabatun it andang government sa Virginia USA hay kapin eamang sa 20,000 nga pomoeuyo ro natigayun nga mabakunahan.
Puro Pfizer/BioNtech ag Moderna vaccine man sigon ro andang ginagamit.
Una nga gintaw-an it prayoridad sa bakuna ro mga frontliners kapareho mga fire and police personnel.
Samtang, sa mga Overseas Filipino Worker ukon OFW hay ro andang kompanya ro magasabat it andang bakuna bangud cover pa raya it andang insurance.
Raya hay kung legal nga nagatrabaho ro sangka OFW.
Samtang, makabatun man it government assistance ro pobreng pomoeuyo nga indi makasarang magbakae it bakuna.
Apang bukon man suno pa kana it mabug-at para kanda nga magbakae it andang kaugalingon nga bakuna bangud raya hay barato eamang.
Nasayuran nga mabakae eamang idto kanda ro bakuna sa balor nga $5 hasta $ 25 dollars ukon katumbas it 240 hasta 1,200 pesos.
