KALIBO, Aklan—Mas pang ginhugtan it kalibo municipal police station ro implementasyon sa pagsuksok it face mask ag face shields eabi eon sa mga nagasueod sa Kalibo Public Market.
Suno kay Police Lt. Col. Belshazzar Villanoche, hepe it Kalibo PNP nga may ginpang-deploy sanda nga mga tawuhan sa tindahan ag iba pang mga matawong lugar agud nga ipatuman ro face mask ag face shield protocol.
Ginpahayag ni Villanoche nga ro paggamit it face masks ag face shields hay mabahoe nga proteksyon agud nga indi matapnan it deadly virus.
Sa pihak suno kana it hugut nga pagbantay, haeos adlaw adlaw man nga may nadadakpan nga violators kun sa siin pila sa mga nagapakamatig-a hay gina-isyuhan it citation ticket.
Mag-eowas kara, hugut man ro andang pagbantay sa curfew hous nga mas ginpatag-od makaron sa 10pm to 4am.
Nagpaandam imaw sa mga violators nga raya hay may mabug-at nga multa makaron nga naga abot sa kapin sa 2,500 pesos.
Angot kara, nag apela ro hepe it kalibo pnp nga seryosohon ro pagsunod sa health and safety protocols eabi eon ro pirmeng pag disinfect it alima ag social distancing.
