KALIBO, Aklan–Umarangkada eon ro National Deworming Month Program it Department of Health (DOH) makaron nga buean it Enero.
Tuyo kara nga matapna ro mga soil-transmitted helminthiasis.
Ro deworming ukon pagpurga sa mga unga ag magueang hay sangka pamaagi it pagtao it bueong nga nagapagguwa sa mga parasites sa eawas kapareho it mga fluke ag tapeworm.
Ro makarondaya nga mga organism hay nakakahalit sa kaeawasan bangud sa maeain kara nga epekto sa intestines.
Suno kay Dr. John Wibelle Ingles, Municipal Health Officer it Rural Health Unit (RHU)-Lezo nga kinahang-ean magpaidaeom sa deworming ro mga unga bangud mabahoe ro andang risgo sa pag-angkon it mga impeksyon halin sa bitos.
Agud nga malikawan ro pag-angkon kara dapat likawan ro mga masunod: pagtikang nga owa it tsinelas, paghugas ukon inom it kontaminadong tubi, mga sapat nga infected ag bukon it maayos nga hygiene.
Kung owa it regular nga deworming ag indi maagapan ro pag-abu it bitos, posibleng magkalhit ro mga raya sa bilog nga eawas.
Dugang pa kara nga ro regular nga pagpurga ro sambilog sa pinaka-epektibong pamaagi para mapaeayo sa peligro it pag-angkon it bitos.
Samtang, sa oras nga matueopangdan ro pilang ka mga sintomas it impeksyon, insigidang magpakonsulta sa doktor agud nga mataw-an it nagakaigo nga medikasyon angot sa kondisyon it pasyente.
