KALIBO, Aklan—Importante nga magparehistro it vital events kapareho it pagkatawo, pagpakasae ag pagkamatay.
Suno kay Peter Mangilog it Philippine Statistic Authority ukon PSA-Aklan nga raya ro basehan it gobyerno agud nga makahimo it mga tikang ag programa para sa pomoeuyo.
May kaangtanan kara, nagpanawagan ro PSA-Aklan sa publiko nga magparehistro gid sa andang taeatapan bangud raya man ro basehan it matood nga pagkatawo it sangka indibidwal.
Base sa datos it taeatapan, nakalista it kapin sa 10,578 ro PSA-Aklan nga mga nagparehistro ko dag-on 2020.
Mas manaba raya it 24 percent kumpara ko dag-on 2019 nga kapin sa 13 ,854.
Samtang, target man it ahensiya nga makaangkon it birth certificate ro tanan nga tawo sa dag-on 2024.
Raya hay bangud may una sa gihapon nga mga ginikanan nga owa ginaparehistro ro andang mga inunga.
Samtang, bangud sa pandemya tuga it coronavirus disease 2019 ukon covid-19, nagnaba man it 15 percent ro mga nagpakasae nga mga magkarelasyon sa probinsya.
Base sa datos, nakalista eamang it 1,519 couple nga mga nagpakasae ag kaabuan sa mga raya hay nagpakasae ko buean it Disyembre kung sa siin haeos ginhaeugaan eun ro restrictions sa probinsya.
Mas manaba man raya it masobra katunga ko dag-on 2019 nga 2,599.
