KALIBO, Aklan–Sa pihak nga may maibulig ro pag-import it galunggong agud nga mapun-an ro kakueangan it isda sa nasyon, apang nagakasubo ro mga fish vendors sa kahimtangan it mga mangingisda
Suno kay Rosalia Tampos, presidente it fish vendors association sa kalibo public market nga bangud sa importasyon hay nagakaduea-an it pangabuhian ro mga mangingisda sa Pilipinas.
Nagakalugi sigon ro mga local nga mangingisda sa nasambit nga tikang it gobyerno.
Sa kamatuoran suno kana hay owa dapat nga naga-import it galunggong ro gobyerno bangud nga bugana kara ro kaeawran it nasyon.
Nagakadapat sigon nga taw-an it proteksiyon ag nagakaigo nga suporta ro mga mangingisda nga nagapanagat sa West Philippine Sea.
Madumduman nga nag-abot eon sa nasyon ro masobra sa 13,000 metric tons it imported nga isda kaibahan eon ro galunggong.
Suno sa Bureau of Fisheries and Aquatic Resources ukon BFAR, ro nag abot nga supply hay mabahoe nga bulig agud nga masabat ro kinahangeanon it publiko.
