Uman nga maga-import it galunggong ro nasyon.
Maabu ro nagaeaum nga owa it importasyon nga matabu eabi eon ag nagpahayag si President Marcos Jr. kato nga owa eon imaw nalipay sa pag-import.
Suno kana nga masakit sa anang baeatyagon ro pag-import it mga produkto ukon bagay nga may una man sa nasyon.
Namitlang pa it presidente nga magapangayo imaw it bulig sa Indonesia kon paalin nga mapa-abu ro dakop nga isda.
Kilaea ro fisheries sector it Indonesia nga mabaskog.
Raya hay nagapakita eamang nga mas kaintigo ro Indonesia kun ro pagpangisda ro paga-istoryahan.
Kaintigo sanda nga magpa-abu it isda ag indi eon kinahangean nga mag-import pa.
Maabu ro nagaeaum nga indi eon maga import it isda ro Pilipinas bangud sa ginhambae ni Marcos.
Apang nakibot ro tanan sa 25,000 metrikong tonelada it galunggong nga iga-import bangud nga kapos sigon sa supply.
Naapektuhan sigon it mga nag-agi nga bagyo rason nga ginkapos.
Sambilog pa sigon sa rason hay ro pagbawae nga magdakop it isda kada Disyembre bangud nga tiempo it pagpangitlog.
Hugut nga ginabaeabagan it grupo it mga mangingisda ro pag-import it isda.
Sa pag-import it galunggong, ro mga ordinaryong mangingisda ro maduea-an it pangabuhian.
Sa pagdagsa it imported, owa eon it magabakae sa dakop it mga makaeoeo-oy nga mangingisda.
Siguradong mas barato ro imported rason nga owa it magabakae sa dakop it mga lokal nga mangingisda.
Paabuon ro dakop agud nga indi eon mag import.
Pahueagon ni Marcos ro Bureau of Fisheries and Aquatic Resources (BFAR) nga mag obra it pamaagi agud nga indi mauman ro pag import it galunggong.
Kaugalingon nga dakop halin sa maeapad nga kaeawran ro ipahaum sa lamesa it pamilyang pinoy.
