BANGA, Aklan—Nag-apela si Rosebelle Flores, ina it 15 anyos nga si Jhuros Flores nga punduhon eon ro nagkaeain-eain nga mga espekulasyon angot sa pagka-eumos it anang unga.
Suno kana nga samtang nagabuhay ro pag-usoy sa eawas it anang unga hay nagkaeain-eain man nga istorya ro nagaguwa nga imbes nga makabulig hay mas pa nga nagpa-grabe sa kasubo nga andang nabatyagan .
Raya sigon ro rason kon ham-an nga naghinyu imaw sa maestra it anang unga nga maimbitahan sa police station ro mga kaklase kara nga ulihing naka-ibahan sa pagpaligos sa suba .
Tuyo nana nga mabatian mismo kanda ro matuod-tuod nga natabu agud nga matuldukan eon ro mga fake news nga nagalibot.
Ginpahayag dugang ni Rosebell nga may nabatian imaw nga nagpatigayon it initiation rites sa lugar ag biktima it hazing ro anang unga kamana man nga naka-inom raya kat matabu ro insidente.
Samtang, handum gihapon nanda nga makita ro anang eawas.
Sambilog sigon sa anang tiya hay ginpa-damgo ni jhuros nga buligan imaw nga mabo-oe bangud nga una pa imaw sa lugar nga anang gin-eumsan sa pinaka-idaeum it puno sa ubos it tubi.
Sa sueod it an-um nga adlaw nga anang pagkaduea hay owa gid kanda nakapabatyag nga mag-asawa ro andang unga.
