Naka-alerto eon makaron ro mga tawuhan it Provincial Disaster Risk Reduction and Management Office ukon PDRRMO-Antique sa pag-umpisa it 2025 Western Visayas Regional Athletic Association ukon WVRAA meet nga pormal nga nagbukas, hapon it Domingo, Marso 2 sa Binirayan Sports Complex sa San Jose de Buenavista sa nasambit nga probinsiya.
Suno kay Broderick Gayona Train, head it PDRRMO-Antique nga bilang pagpahaum hay gin-activate nanda ro andang emergency operations center sa idaeum it incident management agud nga bantayan ro sporting event hasta sa pagtapos kara sa Marso 8.
Ginpahayag dugang nga ro andang preparasyon hay nag-umpisa pa ko Pebrero 25 it makaron nga dag-on.
Mag-eowas kara, activated eon man ro kapin sa 180 nanda nga mga personnel kaibahan ro dugang nga pwersa halin sa 15 nga local government units it antique ag Kalibo ag Passi City sa probinsiya it Iloilo.
Sa kamatuoran suno kana hay naka-Blue Alert status eon sanda agud nga masiguro ro seguridad ag kaeowasan it delegado.
Mag-eowas sa billeting areas, ro Antique Provincial Government hay ginpasiguro ro security ag contingency plans sa kada sporting event.
Kapin sa 6,000 nga mga student-athletes ag coaches halin sa mga probinsiya it Aklan, Antique, Capiz, Guimaras, Iloilo, ag Negros Occidental ro magasabak sa kompetisyon.
