Sa pagkaaresto sa suspek nga si Mark Archie Torrefeil sa Brgy. Pinagbuhatan, Pasig City, insigida raya nga gindaea sa kampo krame kon siin ginpatigayon ro booking process kaeakip eon ro pagbueo it mugshot ag dikara eon imaw gin-adtunan ni incoming Kalibo mayor Juris Sucro.
Suno kay Sucro sa anang pakipag-angot kay Torrefeil, gin-ako sigon kara nga panakaw eamang ro anang plano sa establisyimento ag uwa it balak nga patyon ro on duty nga reliever-manager nga si Bonna Hercia Ambay.
Apang, natintar ro suspek nga bun-on ro biktima kat hana kara nga pinduton ro hestirical button nga konektado sa Kalibo PNP.
Una sigon nana nga gindusak ro liog it daeaga agud nga maghipos sa pagsinggit apang padayon ro pagsukoe it biktima rason nga ginpasundan nana raya it pagbuno.
Ap-at eamang sigon ro anang natandaan nga pagdusak sa daeaga apang sa resulta it autopsy examination hay nakaangkon raya it 18 ka mga igo sa nagkaeain-eain nga parte it eawas.
Ginahayag dugang ni Sucro nga nag-ako ro suspek nga naglitik ro anang ueo matapos nga ginasukot sa ginprenda nga motor nga nagaabot sa P8,000 matapos nga ginpyerde nana raya sa sugae sa sangka namatyan sa banwa it Numancia.
Madumduman nga si mayor elect Sucro ro unang nagtanyag it kapin sa P30,000 nga padya para sa madasig nga pagkaaresto it suspek ag personal nana raya nga ginta-o sa CIDG
