KALIBO, Aklan—Hugut nga ginpamalibaran ni incumbent barangay kagawad Palmy Meliton it Libas, Banga ro reklamo kontra kana angot sa vote buying.
Sa interview it Bombo Radyo, gin-insister ni Meliton nga owa it vote buying nga natabu bangud nga mabahoe ro kumpiyansa kanda it mayoriya it andang mga pumueuyu kun sa siin haeos 10 dag-on eon imaw nagapanerbisyo sa konseho.
Aminado man ro opisyal nga nag-agto imaw sa tagreklamo nga si Eddie Andrade bukon it agud nga magpangayo it pasaylo kundi nga agud nga klaruhon ro isyu nga owa imaw nagtau it sobre sa anang 16-anyos nga unga nga gina alegar nga may sueod nga 500 pesos.
Dugang pa kara nga nagapabilin nga palaisipan kana kon ano ro motibo ni Andrade bangud nga owa man sanda it away nga daywa.
Apang mabahoe ro pagpati it andang grupo nga may tawo sa likod it nasambit nga mga alegasyon kontra kanda.
Nauna eon nga ginreklamo si Meliton kaibahan ro iba pa nana nga kapartido sa pagpanguna ni incumbent barangay captain Jessie Morales sa Commission on Elections ukon Comelec Aklan it vote buying it ginpahalin nanda nga dating barangay tanod nga si Andrade.
Samtang, ginpahayag man ni punong barangay Morales nga may nabatian sanda nga target it ginasuportahan nga grupo ni andrade nga mabayluhan ro tanan nga opisyal nga presenteng nakapungko ag gina-alegar nga nagtaeana pa it pondo para sa paga-obrahon nga demolition job.
May kaakig sigon kana si andrade matapos nga gin-terminate raya bilang tanod.
Samtang, medyu imposible sigon ro alegasyong bangud nga agahon sanda nag-house-to-house campaign kaibahan ro bilog nanda nga line-up eakip ro mga kandidato it sangguniang kabataan.
Bangud sa pagsamad sigon sa dignidad ag reputasyon nanda , haum sanda nga rumesbak pinaagi sa pagpasaka it kaso sa korte.
