KALIBO, Aklan—Inde eon madayon ro uman nga pagbalik kunta it operasyon sa Kalibo International Airport sa maabot nga adlaw it Miyerkules, Hulyo 1.
Raya hay kasunod sa ginpaguwa nga abiso it National Action Plan on COVID-19 kon sa siin temporaryo nga igasuspinde ro pagpauli it mga Locally Stranded Individual sa Western Visayas ukon Region 6 ag Eastern Visayas ukon Region 8 halin sa Metro Manila.
Suno kay Civil Aviation Authority of the Philippines (CAAP) Aklan manager Engr. Eusebio Monserate Jr., uwa eon it mga domestic flights nga magabyahe umpisa sa adlaw it Miyerkules.
Ginpahayag dugang nga definite ro suspension it mga byahe it eroplano ag ro operasyon it paeoparan hay until further notice.
Sa pihak kara, nagsumiter gihapon it passenger manifest ro mga airline companies nga may schedule flight sa nasambit nga adlaw bilang pagsunod sa requirements nga gintaeana it gobyerno probinsyal.
Madumduman nga sa Executive Order number 28 series of 2020 nga ginpaguwa ni Aklan Governor Florencio Miraflores hay ginapasugtan nga magbukas it uman ro paeoparan.
Apang, ro domestic flights hay intended eamang para sa mga returning overseas Filipino workers ukon ROF’s ag Locally Stranded Individual ukon LSI’s.
Nakabaehag dugang sa EO it gobernador nga daywang ka flights per airline sa sueod it sang dominggo ro ginapasugtan nga makabyahe sa KIA.
Nauna eon nga ginpahayag ni Defense Secretary Delfin Lorenzana, chairman it NAP COVID-19 nga gin-aprubahan nana ro daywang dominggong moratorium it pagbalik it mga LSIs sa Negros Occidental ag Iloilo, kamana man sa Eastern Visayas kasunod it nakakaalarmang pagtaas it COVID-19 cases sa mga nasambit nga lugar.
Ginhinyo sigon mismo it mga local chief executives it daywang rehiyon ro suspensyon it pagbiyahe it mga LSIs kon sa siin mismong mga natungdan nga local government units (LGUs) ro nagpamalibad nga magbaton it mga nagabalik nga kababayan bangud sa kabaeaka nga magataas pa ro COVID-19 cases sa andang lugar.
