KALIBO, Aklan–Nagpanindugan si Senador Cynthia Villar, Chairman it Senate Committee on Environment and Natural Resources nga indi eon makaangkon it extension ro pagpasarado sa isla it Boracay nga magatapos sa Oktubre 25.
Raya hay kasunod it ginpatigayon nga rehabilitation effort it inter-agency task force sa nasambit nga tourist destination ko buean it Abril.
Suno kay Villar nga raya hay maskin nga 30 porsiyento eamang it mga establisiemento ro makadungan sa pagbukas it isla sa Oktubre 26 nga kon sa siin naka-comply sa mga requirements partikular ro pag-konekta sa sewer line ag may kaugalingon nga sewage treatment plants.
Nauna eon nga nagpahayag it pagkadismaya ro senadora sa ginpatigayon nga Senate hearing bangud sa owa nagakasinanto nga numero nga gintau kana it mga resource persons.
Gindayaw man kara ro infrastructure repairs sa isla, apang ro higku nga ginakabaeak-ean nga maga-agto sa baybayon it Boracay hay makatuga gihapon it problema.
Bangud kara, ginsuhestiyon nana nga magtanyag ro gobyerno it diskwento agud nga maengganyo ro mga negosyante nga mag-konekta sa wastewater treatment bangud sa masyadong mahae nga baeayran.
