KALIBO, Aklan–Nagpagguwa it Executive Order No. 32 si Kalibo Mayor Juris Bautista Sucro para i-adopt ro EO No. 3 nga gin-isyu ni Pangueong Ferdinand “Bongbong” Marcos Jr. angot sa boluntaryo nga pagsuksok it face mask sa outdoors.
Kadungan kara, ginklaro ni Carla Suñer Doromal, Executive Assistant I to the Mayor nga indi dapat maging kampante ro mga pumueoyo sa baylo hay makaangkon it gihapon it konsiderasyon sa ibang kaibahan nga may mahina nga immune system ag mga senior citizen.
Samtang, gina-engganyo man ro mga immunocompromised individual ag katigueangan nga magsuksok gihapon it face mask para maprotektahan ro kaugalingon kontra COVID-19 ag iba pang baeatian.
Nasayuran nga ginapasugtan eon sa bilog nga nasyon ro pagbuoe it face mask sa mga open areas nga may maayos nga bentilasyon ag bukon it crowded nga lugar.
Sa makaron, daywa eon lang ro nailistang kaso it COVID-19 sa banwa it Kalibo kamana man nga nagtaas eon ro vaccination rate.
