May mga nagamadali eon nga pati ro pagsuksok it face mask hay gusto eon nga ipabo-oe bangud sigon nga una eon sa low risk ro bilog nga nasyon sa COVID-19.
Naghambae eon si pangueong duterte nga indi nana pagaboe-on ro mandato sa face mask maskin pa nga padayun nga naganaba ro quarantine levels bangud man sa pagnaba it mga bag-ong kaso it virus.
May nagtuhaw eon man nga bag-ong variant ag makabulig gihapon ro pagsuksok it face mask agud nga malikawan ro pagtaeapnan.
Maskin ro pila pang sueundanan nga ginapatuman it IATF hay kinahangean nga mataw-an it atensyon.
May pilang kaiping nga nasyon nga makaron hay nakaexperiensiya eon man it surge ukon gulping pagtaas sa kaso it COVID.
Sambilog sa mga ginasugid nga rason hay bangud sa naging kampante eon sanda.
Nagbo-oe eon ukon bukon eon it mandatory ro pagsuksok it face mask ag maabu pa ro mga bukon it bakunado.
Sa mga political rally ukon events, makahaeadlok bangud nga ro naging panagang eon lang hay ro face mask ag owa eon it physical distancing.
Basi nga malipat ro kaabuan sa init it mga hitabu sa eleksyon.
Kabay nga indi anay magpinagusto ag isipon ro naging malisod nga sitwasyon ko kasagsagan it pandemya nga ro tanan hay eubus nga naapektuhan.
Dahan-dahan eang agud nga owa it pagahinoesuean.
