Gulping nagtaas ro numero it kaso it COVID-19 sa nasyon.
Suno sa Department of Health (DOH), nailista kan-o eamang, Hunyo 12, ro 308 nga bag-ong pagtaeapnan it COVID.
Raya sigon ro pinakamataas nga kaso it sakit sa sueod it daywang buean.
Kapin sa 2,918 man ro panibag-ong aktibong kaso it sakit sa nasyon.
uno sa DOH, 153 sa 308 hay nailista sa Metro Manila.
Angot kara, naga-abot eon sa 3,693,222 ro kabilugang kaso it COVID-19 sa Pilipinas.
Nakalista man it 60,461 nga namatay sa sakit samtang kapin sa 3,629,843 ro kabilugan nga nagmayad.
Samtang, ginpahayag man it DOH nga ro pagtaas it COVID cases hay indi makonsiderang “significant” sa makaron.
Ginklaru nga owa man nagtaas ro severe ag critical cases.
Dugang pa it DOH, sambilog sa mga factors nga naka-contribute sa pagtaas it infections hay ro presensiya it mas makataeapon nga Omicron subvariant ag ro naganaba nga immunity, bangud nga maabu pa ro owa naturukan it booster shots.
Sa pihak kara, indi naton paghueaton nga makibot it mas mataas pang bag-ong kaso it COVID-19.
Dapat kabisado eon naton ro mga dapat ag indi dapat obrahon agud nga makalikaw sa sakit.
Maghinay-hinay sa pagwinarang ag pag-agto sa mga matawong lugar.
Nasayuran naton nga hilway eon kita bangud sa haeuga nga mga protocols apang indi magpabaya.
Bukon pa it tapos ro away sa pandemic.
Haeos naga-umpisa pa eang kita nga makabawi, indi naton pag-uyangan ro kahigayunan.
