Kalibo Aklan ——-Naunsyami ro uman nga pagbangon it industriya it turismo sa Isla it Boracay.
Raya hay kasunod sa travel restrictions nga ginpaguwa it tagsa ka gobernador it mga kaeapit nga probinsya nga epektibo halin ko July 1 hasta it July 15, 2020.
Suno kay Malay acting mayor Frolibar Bautista, ginaeauman ro probinsya it Capiz ag Iloilo ro mabahoe nga market kunta sa uman nga pagbukas it Isla para sa mga lokal nga turista apang uman raya nga maapektuhan bangud sa pagsarado it andang mga border area.
Ginpahayag dugang nga siguradong uwa eon it magabakasyon sa Boracay sa nasambit nga petsa.
Eubus suno kana nga naapektuhan ro industriya it turismo it COVID-19 pandemic kon sa siin ro uman nga pagbangon it Isla ro ginasaligan nga makabulig kunta sa uman nga pag-umwad it ekonomiya apang uman raya nga maunsyami.
Ginpahayag dugang ni Bautista nga halin ko June 16 hasta it 30, 2020 hay nakalista it 83 tourist arrival ro Municipal Tourism Office.
Madumduman nga ginpasugtan it National Inter Agency Task Force on COVID-19 ro Isla nga magbukas para sa mga turista it Western Visayas provided nga pagasundon it mga raya ro minimum health protocols.
