Nagdasig ro inflation rate ukon ro pagtaas it pangkabilugang lebel it presyo it mga baeak-eon ag serbisyo sa nasyon ko buean it Nobiyembre 2024.
Raya eon ro ikaywang sunod nga buean nga nakalista it madasig nga inflation halin sa 2.3% nga inflation nga nailista ko Oktubre.
Gintumod ni PSA chief Undersecretary Claire Dennis Mapa nga ro rason it mas madasig nga inflation hay bangud sa pagtaas it presyo it pagkaon ag transportasyon ko Nobiyembre.
Nagdaea man raya it year-to-date average inflation rate nga 3.2% nga sueod gihapon sa target it gobyerno it 2% hasta 4% inflation rate para sa bilog nga 2024.
Samtang, ginpahayag mat-a ni National Economic and Development Authority (NEDA) Secretary Arsenio Balisacan, sa pihak it epekto it mabaskog nga mga bagyong tumama sa nasyon sa mga nakataliwan nga buean, nagapabilin nga malig-on gihapon ro mga presyo it mga baeak-eon.
Nagapakita sigon raya it kalig-unan it aton nga ekonomiya ag pagiging epektibo it aton nga mga polisiya.
Angot kara, ginpahayag it opisyal nga maid-id nga ginabantayan it gobyerno ro mga presyo it commodities kapin eon ro mga pagkaon kasunod it pagpanaeasa it mga nagtaliwan nga bagyo ko Oktubre ag Nobiyembre.
Dugang it NEDA chief nga nagapabilin ro kumpiyansa it gobyerno nga magapabilin ro inflation rate sa Disyembre ro trend it presyo ag magapabilin nga sueod sa target range it gobyerno.
