KALIBO, Aklan–Gin-anunsyo it Provincial Disaster Risk Reduction and Management Council ukon PDRRMC nga nag-abot eon sa 17,731,920 pesos ro kahalitan nga tuga it bagyong Odette sa agrikultura ag imprastraktura sa bilog nga probinsiya it Aklan.
Raya hay base sa andang ginpaguwa nga partial damage assessment report.
Ro kahalitan sa agrikultura hay nag-abot sa 1,348,320 pesos samtang sa imprastraktura man hay kapin sa 16,383,600 pesos eabi eon sa banwa it new Washington nga nakaangkon it kasamaran ro andang sea wall.
Samtang, suno pa sa PDRRMC nakalista ro haeos tanan nga banwa sa aklan it evacuees mag-eowas eamamg sa banwa it Lezo.
Nag abot sa kapin sa 12,671 nga pamilya ukon katumbas it 49,400 nga katawo ro nagbakwit sa andang mga mga evacuation centers samtang ro iba hay sa baeay it andang mga kaeapitbaeay nga malig-on ag mga igbata.
Masobra sa 249,985 pesos ro assistance nga gintaeana para sa mga evacuees partikular nga gingastos sa andang mga pagkaon.
Samtang, pito nga kabaeayan ro partially destroyed bangud sa bagyo kun sa siin owa man it nailistang eubusan nga naguba.
Angot kara, ginpasaeamatan ni ibardolasa ro kooperasyon nga ginpakita it mga natungdan nga ahensiya ag ko mga pumueuyu.
Ro Aklan hay ginpaidaeum sa storm signal no. 2 sa pagpanaeasa it bagyong Odette.
