KALIBO, Aklan—Bangud sa joint effort it nagkaeain-eain nga law enforcement agency, natigayon nga napasaalima it uman it mga otoridad ro nag-eskapo nga inmate nga si Randy Fulgencio.
Raya hay matapos ro masobra 40 diyas nga pag-ayam kana hay naging madinaeag-on ro gintingob nga pwersa it pulisya nga uman raya nga madakpan.
Suno kay PLt.Col. Ricky Bontogon, hepe it Kalibo Municipal Police Station nga naging madinaeag-on ro transaksyon kana sa bulig man it mga masaligan nga impormante it mga law enforcement agency.
Mag-eowas kara, maabo man ro naging interesado sa reward nga nakapatong sa ueo it inmate rason nga madinaeag-on nga nahueog sa alima it mga otoridad.
Madumduman nga nakaeskapo si Fulgencio sa Aklan Rehabilitation Center (ARC) sa Brgy. Nalook, Kalibo ko Hunyo 6 matapos nga makabuoe it tyempo samtang naga-ilabas ro mga jail guard.
Ginsaka nana ro pader kon sa siin imaw nag-agi ag nakaguwa sa nasambit nga pasilidad.
Si Fulgencio hay may kaso nga pag-eabag sa Republic Act 9165 ukon Comprehensive Dangerous Drugs Act of 2002 ag Robbery.
