KALIBO, Aklan—Ginserbehan it warrant of arrest sa sueod it Aklan Rehabilitation Center ro ginatumod nga suspek sa pagbaril-patay kay dating Malinao SB member Jhun Rondario ko nagtaliwan nga Enero 25, 2020 samtang sakay it anang motorsiklo pauli sa andang panimaeay sa Brgy. San Roque, Malinao.
Ro suspek hay ginkilaeang si Mario Castillo, sa legal nga edad, residente it Sitio Ilaya, Brgy. Malandayon, Malinao kon sa siin presente man raya nga nakakulong sa nasambit nga pasilidad bangud sa kasong paghupot it illegal nga armas ag granada kasunod it pagraid sa andang panimaeay ko Marso 18, 2020 matapos nga ginreklamo nga nagapinaeopok it baril sa andang residensya.
Ro ginserbe kana nga warrant of arrest hay sa kasong Murder nga ginpananaog ni Hon. Joebil Delmoro, presiding judge, RTC Branch 2, Kalibo, Aklan nga may petsang Abril 6, 2021.
