KALIBO, Aklan—Matsa ginapabahoe eamang it mga media outlets ro isyu may kaangtanan sa mga insidente it ‘hate crimes’ kontra sa mga Asyano sa Estados Unidos.
Suno kay Bombo International Correspondent Pinoy Gonzales it Houston, Texas nga ro media eamang ro nagapabahoe it numero it mga napatay ukon nabiktima it pag-atake sa mga Asian Americans sa nagkaeain-eain nga parte it nasambit nga nasyon.
Apang base suno kana sa sangka survey, nagapabilin nga normal ro nasambit nga numero ag owa it anuman nga nataeupangdan nga pagtaas it krimen kontra sa mga Asians kumpara ko nagtaliwan nga dag-on ukon antes ro pagtama it covid 19 pandemic.
Nagatuhaw suno kana nga matsa ginapa-away it media ro mga raya.
Sa kamatuoran sigon hay bukon eamang it mga asyano ro nagiging biktima it mga grupo nga nagapanghalit kundi maskin ro mga puti ag itom nga amerikano hay gina-atake man.
Kaabuan sigon sa mga krimen hay nagakatabu sa California, east coast ag iba pang mga mabahoe nga estado sa US.
Kaeabanan suno kana nga mga pakawala ukon alipores it democrats ro mga nagatuga it gulo.
Ginpahayag dugang nga sa kabuhay eon nana sa Amerika hay owa imaw naka-eksperiensiya nga ma-harass ag kaeabanan nga gina-respeto ro mga Filipino idtu.
Aminado man si Gonzales nga nagakalhit makaron ro pandemic-related racism nga ro gina-target hay Asian-Americans sa social media eabi eon ro mga Chinese.
