KALIBO, Aklan—Nagsueod eon ro buean it Marso nga ginakabig nga ‘Fire Prevention Month’.
Sa raya nga buean, kaeabanan nga nakakalista it mataas nga numero it sunog.
Raya eon ro ginapahauman it Bureau of Fire Protection (BFP) eabi eon ag nakitaan it kapin sa 44 porsiyentong pagtaas sa insidente it sunog sa unang daywang buean pa eamang it dag-on sa bilog nga nasyon.
Makabig sigon raya nga mataas kun sa siin 2,619 eagi ro insidente it sunog ro natabu kumpara sa kaparehong petsa ko nagtaliwan nga dag-on nga 1,812.
Suno sa BFP, posibleng raya hay bangud sa kahaeugaan nga ginpatuman bangud sa padayun nga pagnaba it kaso it COVID.
Kumpara ko nagtaliwan nga mga dinag-on kun sa siin nakapaidaeum ro maabu nga lugar sa mga lockdown.
Padayun ro padumdum it BFP nga maging madahan eabi eon sa paggamit it mga electrical connection sa mahabang oras nga kaeabanan nga nagiging rason it sunog.
Makaron nga magapasueod eon ro summer, ginaeauman nga mas mailista ro pagtaas it insidente it sunog.
Pirmeng tandaan nga mas grabe ro maduea kon masunugan.
Bukon eamang ro bilog nga pangabuhian ag ilistaran pati kabuhi.
Samtang sa tiempo it campaign period, hambaean it mga kandidato ro andang mga supporters nga likawan nga ibutang ro andang mga tarpaulin, banner ukon anuman nga campaign materials sa kable it kuryente nga eubus nga delikado ag pwede man nga umpisahan it sunog.
