KALIBO, Aklan—Antes pa man ro mandu it bag-ong hepe it Philippine National Police nga si Gen. Guillermo Eleazar angot sa paglunsar it “Intensified Cleanliness Policy” ukon ICP, ginpahayag ni P/Lt. Col. Don Dicksie de Dios, hepe it Malay Municipal Police Station nga ginahimo eon nanda raya sa limang Police Community Precinct it nasambit nga banwa.
Suno kana nga tuyo it ICP nga maitama ro mga minor ukon maisot nga mga problema sa serbisyo.
Kaibahan eon kara ro pagpasiguro nga malimpyo ro tanan nga mga presinto, estasyon ag opisina.
Kon malimpyo suno kana ro ugsaran pa eamang it estasyon hay makasigurado nga makabo-oe it nagakaigo nga respeto ag kumpiyansa sa mga pumueuyu.
Angot kara, ginpasaeamatan ni de Dios ro suporta it mga stakeholders sa pag-ayos it andang mga police stations nga ginaeakipan it tatlo sa isla it Boracay ag daywa sa mainland Malay.
Sa pihak nga parte, uman nga nag apela si Lt Col de Dios sa mga residente ag mga turista sa Boracay nga padayun nga maging vigilante ag seryosohon ro pagsunod sa minimum health and safety protocols bangud nga nagapabilin ro paeag it makamaeatay nga COVID-19.
