KALIBO, Aklan—Kumpiyansa ro Boracay Inter-Agency Task Force nga antes sanda nga mabungkag hay matapos nanda ro andang mga target para sa daywang dag-on nga rehabilitasyon sa isla.
Suno kay Boracay Inter-Agency Rehabilition Management Group (BIARMG) general manager Natividad Berdandino nga 67 porsiyento it 339 nga commercial ag residential structures sa bibi it baybay hay nakasunod eon sa 25+5 meter shoreline easement rule.
Ginpahayag dugang nga hasta sa makaron hay hugut nga ginapatuman ro maximum carrying capacity it isla nga 19,215 tourists, kun sa siin, naga-average sa 5,639 ro turista nga nagasueod sa sang adlaw.
Ginpahayag pa ni Berdandino nga ro main road hay ginaeauman nga matapos sa pagtapos it dag-on ag ro iba pang road sections hay sa Abril ukon Mayo 2020.
Madumduman nga ko Mayo 8, 2018, nagpaguwa si Pangueong Duterte it Executive Order No. 53 nga nagatukod it task force ag gintaeana si Department Environment Natural Resources (DENR) Sec. Roy Cimatu bilang chairman.
Samtang, gindayaw ni Cimatu ro pagtinguha it task force ag ro iba pang nagbulig sa rehabilitasyon.
Nasayuran nga ro Boracay hay ginpasarado ko Abril 26, 2018 agud nga taw-an it daean ro 6 nga buean nga rehabilitation program.
Uman raya nga ginbuksan ko Oktubre 26, 2018 nga may hugut nga regulasyon sa paggamit it sikat nga white beach ag pagsueod it mga turista.
