KALIBO, Aklan — Nakataeanang magpatigayon it final meeting sa Setyembre 28, adlaw it Biyernes ro inter-agency task force agud maisapinal eon ro mga patakaran it Department of Tourism, Department of Environment and Natural Resources ag Department of Interior and Local Government sa pagbukas it Boracay sa Oktubre 26.
Ginaeauman man nga paga-istoryahan ro dry run sa Oktubre 15 nga nagatuyong ma-assess ro iba pang mga dapat himuon antes ro reopening it isla sa domestic ag foreign tourists.
Sambilog eon kara ro paglimita sa oras it pilang water recreational activities kaparehas it paggamit it jet ski ag ro pagbawae it mga party sa beach front kaparehas it sikat nga LaBoracay.
Mag-eowas sa pagpanigarilyo ag pag-inom it aeak sa pampublikong lugar, bawae man ro fire dancers ag ginaistudyuhan man ro pagbawae sa paghimo it sand castles nga patok sa mga turista.
Ginapahayag nga pagatalakayon it uman ro carrying capacity ukon numero it mga turistang makasueod sa isla sa sueod it sang adlaw agud masigurado kalimpyuhan sa Boracay.
Nauna eon nga ginpahayag ni Environment Secretary Roy Cimatu nga maabong pagbag-o ro andang igapatuman sa Boracay sa uman nga pagbukas kara.
