KALIBO, Aklan—Magabalik eon ro international flight operations sa Kalibo International Airport umpisa sa buean it Hunyo.
Suno kay Engr. Eusebio Monserate, Jr. manager it Civil Aviation Authority of the Philippines ukon CAAP-Aklan nga daywang airline companies nga puro magahalin sa Incheon, South Korea ro magabalik it andang operasyon sa nasambit nga paeuparan sa Hunyo 17 ag Hunyo 22.
Makaangkon ro mga raya it tig-daywang flights kada domingo.
Nasayuran nga temporaryong ginsuspinde ro pagbaton it mga dumueuong nga turista sa paeuparan umpisa ko 2020 bangud sa paeag it COVID 19 pandemic.
Sa makaron hay todo sigon ro andang preparasyon para kara kaibahan ro Bureau of Quarantine, Bureau of Customs ag Bureau of Immigrations.
Haeos tanan sigon nga empleyado it paeuparan hay malipayon ag excited eon sa uman nga pagbalik it mga foreign tourists.
Bukon eamang sigon ro mga turista ro ginaeauman kundi ro mga Koreano nga negosyante.
Samtang, ginkumpirma ni Engr. Monserate nga may iba pang mga airline companies ro padayun nga nakikipag-angot sa andang taeatapan agud nga makaangkon it flight.
Apang problema it mga turista ro mga travel requirements matapos nga may iba pang nasyon nga hugut ro pagpatuman it health protocols partikular ro maeawig nga quarantine pagbalik sa andang natungdan nga nasyon.
Pila sa mga raya hay naghalin sa China ag Thailand.
Ginaeuman nga sa oras nga maumpisahan ro direct ukon regional flights hay magiging sunod-sunod eon raya.
Samtang, hugut sa gihapon nga igapatuman ro health and safety protocols sa paeuparan tuga it paeag it covid 19 kamana man it monkey pox virus.
