Kalibo Aklan —–Halin sa kabilugang 30 international flights kada adlaw ro nagahugpa sa Kalibo International Airport, nagaabot eon lang raya sa makaron it pito kasunod it nagapadayon nga epekto it coronavirus disease ukon COVID-19.
Ginpahayag sa Bombo Radyo Kalibo ni Civil Aviation Authority of the Philippines (CAAP)-Aklan Manager Engr. Eusebio Monserate Jr., nga nabatyagan nanda it husto ro impact it COVID-19 matapos nga nagnaba sa 200 ro numero it mga pasahero nga naga-aeabutan sa nasambitang paeoparan halin sa numero nga 1,000 nga imaw ro masami nandang nairecord kada adlaw kat uwa pa nagkalhit ro sakit.
Suno pa kay Engr. Monserate, nagapabilin nga uwa it byahe halin sa Wuhan ag Hubei Province sa China kamana man sa administrative region kara nga Hong Kong ag Macau.
Ro Taiwan suno kana hay maga-resume pa ro flights sa paeoparan sa Marso 1 rason nga uwa haeos it makit-an nga Taiwanese tourist sa probinsya it Aklan partikular sa isla it Boracay.
