KALIBO, Aklan — Mabahoe ro posibilidad nga i-suhestiyon it inter-agency task force kay Pangueong Rodrigo Duterte nga ipaidaeum sa state of calamity ro Boracay nga pagasundan it pagpasara kara sa sueod it 60 diyas para sa anumang tourism activities.
Sa interview it Bombo Radyo Kalibo, gin pahayag ni Assistant Secretary Epimaco Densing III it Department of Interior and Local Government (DILG) nga posibling mag umpisa sa Hunyo 1 hasta Hulyo 31 ro 60-day tourist holiday agud taw-an it daean ro pagtibag sa mga illegal structures ag iba pang aktibidades.
Kapin sa 800 establisimento sigon sa isla ro naga pangatubang sa magkaeain-eain nga violations.
Uman sigon nandang paga buhion ro mga tinambakang limang wetlands nga gin patukuran it mga mabahoe nga hotel ag iba pang business establishments nga nagiging rason it mga pagbaha sa isla nga naga serbeng natural catch basin kara.
Gin pahagan-hagan ni Asec. Densing ro kabaeaka it mga taga-Boracay nga magpareho ro kapalaran kara sa dating sikat nga tourist destination nga Dakak nga owa eon nakabawi matapos ipasara ag ipaidaeum sa rehabilitasyon.
Sa pihak nga parte, gin pahayag pa ni Densing nga nagpahayag it interes ro international community nga magtao it pondo sa oras nga ipaidaeum ro Boracay sa state of calamity.
