KALIBO, Aklan–Nagapati ro pamunuan it Aklan Electric Cooperative (Akelco) nga bangud sa ipo-ipo rason nga natumba ro pilang poste it andang kuryente ko adlaw it Biyernes.
Suno kay Akelco assistant general manager for engineering Engr. Joel Martinez nga kapin sa pitong poste nanda ro nasamad nga kon sa siin ap-at kara ro naputoe ag natumba sa Bayanihan Road, Barangay Pook, Kalibo nga naging kabangdanan it pagkaduea it kuryente.
Pila sigon sa mga lugar nga naapektuhan hay ro banwa it Kalibo, Numancia, Malinao ag Makato.
Ginpahayag ni Engr. Martinez nga sa mayad nga swerte hay sa eanas umagi ro ipo-ipo nga may daea nga mabaskog nga uean rason nga owa eubusan nga nabagsakan it poste ro mga panimaeay.
Insigida man nga naghueag ro line men it Akelco agud nga ayuson ro mga natumbang poste agud nga maibalik eagi ro supply it kuryente.
Samtang, ginpahayag pa ni Engr. Martinez nga nagagamit sanda makaron it mga poste nga himo sa steel, concrete ag imported nga mga kahoy nga indi basta-basta nga mapatumba it mga bagyo eamang.
