Kalibo, Aklan — Pagabuksan eon sa maabot nga Mayo 15 it National Irrigation Administration (NIA)-Aklan ro irigasyon, apang paga-unahon anay sa eastern side.
Raya ro ginpaabot ni Engr. Lorena Sioco, Division Manager it NIA Aklan para sa mga mangunguma sa probinsiya.
Suno kana nga masunod nga pagabuksan sa buean it Hunyo ro irrigation canal sa western side.
Madumduman nga ginpasarado ro irrigation system sa Aklan sa sueod it an-um nga buean umpisa ko Oktubre it nagtaliwan nga dag-on agud nga taw-an it daean ro rehabilitasyon ag konstruksyon it P370-million nga diversion dams para sa Aklan River Irrigation System nga nahamtang sa Barangay Sigcay Banga ag Barangay Kinalangay, Malinao.
Ro proyekto hay makabenepisyo sa mga mangunguma sa Kalibo, Numancia, Lezo, New Washington, Banga, Malinao, ag Makato.
