KALIBO,Aklan– Haom eon ro bilog nga pwersa it kapulisan ag lokal nga gobyerno it Malay, Aklan sa ginaeaumang pagbuhos it mga bisita ag turista sa isla it Boracay angot sa nagahilapit nga selebrasyon it kapyestahan ni Sr. San Juan de Bautista.
Suno kay PLt.Col. Don Dicksie de Dios, hepe it Malay Municipal Police Station nga nakalatag eon ro andang deployment sa mga strategic areas bangud sa ginaeauman nga bulto it mga beachgoers eabi eon ag sumakto ro San Juan celebration sa weekend rason nga bilog nga pamilya ro ginaeauman nandang magabakasyon sa Boracay.
Target nanda nga makaangkon it matiwasay nga weekend get-away ro mga bisita rason nga hugot ro andang monitoring ag pagpatrolya sa bilog nga isla para mabantayan ro mga raya ag masiguro ro andang seguridad samtang masadyang nagapalipas it mga oras ag adlaw sa sikat nga isla
Dugang pa ni PLt.Col. De Dios nga ro tanan nga mga aktibidad sa isla hay naka-coordinate sa kapulisan ag LGU Malay kon sa siin, maga-request sigon sanda it dugang nga pwersa halin sa Police Regional Office 6 agud masiguro ro kaeowasan it tanan.
Sa makaron hay umabot eon sa sang milyon ro numero it mga turista nga bumisita sa Boracay ag ginaeauman pang madugangan ro nasambitang numero sa selebrasyon it kapyestahan ni Sr. San Juan de Bautista.
Positibo man ro Malay Tourism Office (MTO) nga maeampasan ro andang target nga 1.8-milyon tourist arrival makaron nga 2023 bangud sa nakikitang pagdagsa it mga bisita kada adlaw.
