Kalibo Aklan ——-Uman nga gin-insister ni Malay Mayor Frolibar Bautista nga nagapabilin nga eowas nga magbakasyon sa Isla it Boracay.
Suno kana nga umpisa nga ginbuksan ro Isla ko Hunyo 16 para sa mga turista nga taga-Western Visayas, amat amat eon nga nagataas ro nailistang tourist arrival.
Nagapabilin suno kana nga zero coronavirus disease ro Aklan ag owa man it nailistang local transmission .
Sa idaeum it Modified General Community Quarantine (MGCQ), hugut nga ginapatuman it mga naga-operate eon nga accommodation establishments ro mandatory nga pagsuksok it face mask ag physical distancing.
Ginpahayag dugang ni Mayor Bautista nga maskin medyu instrikto ro andang protocols, apang tuyo kara nga masiguro nga indi makasueod ro COVID-19 infection sa Isla .
Nasayuran nga kada hotel makaron sa world-class nga tourist destination hay obligado nga magbo-oe it health attendant para sa kaeowasan it staff ag mga turtista kontra sa sakit .
Required man sigon ro pag-presentar it health certificate antes nga makabakasyon .
Mabahoe man suno kana nga bulig ro nakataeanang pag-operate it COVID-19 laboratory sa Aklan , kun sa siin, ro mga turista nga ginadudahan nga na-infect it virus hay insigidang ma-test.
Nagaeaum suno kana imaw nga pinaagi sa ginapatuman nga mga health protocols, iga-promote man it mga nakabakasyon eon nga mga turista sa iba nanda nga mga kakilaea kamana man sa social media nga eowas nga magbakasyon sa Boracay.
Samtang, gindugang pa ni Mayor Bautista nga puro espekulasyon eamang ro mga napabalita nga maabu nga mga property makaron sa Boracay hay “for sale” eon .
Kumpiyansa imaw nga pagkatapos nga magkalma ro pagpanaeasa it COVID-19 hay uman nga magabalik ro kapagsik it turismo sa Boracay .
