Nagbuylog ro Isla it Boracay sa selebrasyon it Earth Hour 2026 kun sa siin ginpatigayon ro dueueungan nga “lights off” bilang simbolo it pag-alaga sa palibot.
Nagpasakop ro nagkaeain-eain nga resort ag establisyemento sa isla pinaagi sa pagpatay it mga bukon it kinahangean nga iwag umpisa alas 8:30 it gabi-i hasta alas 9:30 it gabi-i kadungan it pangkalibutanon nga kampanya kontra sa climate change.
Nasayuran nga pila sa mga kilaeang resort sa Boracay hay nag-organisa man it mga aktibidad kapareho it beach clean-up, community gatherings, ag eco-friendly events agud nga pabaskugon ro awareness it mga turista ag lokal nga residente angot sa pag-amlig sa palibot.
Sa pihak nga parte, nauna eon nga nagpanawagan si Department of Environment and Natural Resources (DENR) Sec. Juan Miguel Cuna sa publiko nga magbuylog sa Earth Hour 2026 bilang kaparte it mas maeapad nga kampanya para sa pag-alaga sa kalikasan.
Ginpamilit it sekretaryo nga ro Earth Hour hay bukon eamang it simpleng “lights off” nga aktibidad kundi sangka padumdum sa tingub nga responsibilidad it kada isaea sa pagprotekta sa kalikasan.
Angot kara, padayun ro panawagan it DENR para sa mas hugut nga aksyon kontra sa mga isyung kapareho it kakueangan sa tubi, polusyon, ag climate change, nga ginapangatubang it nasyon.
