KALIBO, Aklan—Nakalista pa eamang it 179 nga turista ro isla it Boracay umpisa nga raya hay ginbuksan ko Oktubre 1.
Sa datos it Malay Tourism Office, ko Oktubre 1 hay may 35 nga nagbisita sa isla nga ginaeakipan it lima halin sa NCR, 19 ro taga Iloilo City ag 1 ro taga Roxas City.
Ko Oktubre 2, nakalista it 47 nga guests.
Kaabuan kara hay mga Aklanon nga may 39 ag waeo ro taga NCR.
May kabilugan nga 53 ro nailista ko Oktubre 3, kun sa siin 27 ro taga NCR ag 21 ro Aklanon.
Oktubre 4 hay may 31, 15 kara ro taga NCR, daywa ro taga Iloilo City ag 13 ro taga Aklan ag ko Oktubre 5 hay may 13 nga mga bakasyunista, daywa ro taga NCR, tatlo ro taga Iloilo City, daywa ro taga Antique ag an-um ro taga Aklan.
Mag-eowas kara, nadugangan man ro numero it mga hotels ag resorts sa Boracay ro ginpasugtan nga magbukas sa idaeum it new normal nga naga-abot eon sa 204 nga may kabilugan nga 4,474 nga kwarto.
May nakataeana ro mga raya nga health and safety officer nga magatawag sa Boracay Covid Hotline number 152 kun sa siin may mga bisitang magapakita it sintomas it makamaeatay nga sakit.
Sa makaron ro Boracay hay COVID free rason nga padayun ro pag engganyo it mga opisyal nga magbakasyon sa isla agud nga uman nga mabuhi ro turismo sa nasyon.
