Ginklaro ni Engr. Titoy Rodriguez, contractor it proyekto sa Kalibo Elementary School, nga imaw ro nag-inisyar nga mag-imbita it pilang personalidad sa ginhiwat nga pagpa-bindesyon ag pag-turn over it bag-ong School building sa nasambit nga eskwelahan ku adlaw it Byernes, Mayo 29.
Raya hay angot sa naga-sangag nga issue nga nag-eain sigon ro buot ni Uswag Ilonggo Partylist Rep. James “Jojo” Ang sa uwa pag-imbeta kana.
Suno kana, tradisyon sa para kanda nga sanda mismo mapa-blessing sa mga mabahuean nga proyektong andang natatapos antes raya i-turn over sa gobyerno.
Gin-istorya sigon nana ro principal angot sa pagahiwaton nga aktibidad ag nag-tao it ideya nga mag-kangay it mga guest para kara.
Sambilog sigon sa anang gin-hambae hay si Aklan 1st District Cong. Jesus ‘Jess’ Marquez para eon man mag-tao it simpleng mensahe sa programa.
Paathag ni Engr. Rodriguez, uwa sigon nana ginaeauman nga ro maisot ag sangkiri nga saeo-saeo hay maga-angkon it isyu bangud nga raya hay blessing ag turn-over pa eamang, ag bukon it pormal nga inauguration it nasambit nga proyekto.
Nag-pangayo man imaw it pasaylo bangud nga ro ana nga pagkasayod kara hay ro pondo hay maghalin sa Department of Education (DepEd). Tuyo malang sigon nanda nga i-turn over raya para nga magamit sa madali nga panyempo.
Ro nsamabit nga 4 storey building hay may 12 ka mga classroom nga kayang mag-akomodar it maabo nga mga estudyante. Raya sigon hay may masobra P46 milyon nga pondo sa andang kontrata nga ginumpisahan man ku nagtaliwan nga dag-on ag natapos ku nagtaliwan nga buean it presenteng dag-on.
