KALIBO, Aklan—Umpisa kahapon nga adlaw it Domingo, Mayo 9, ginpaidaeum sa lockdown ro estasyon it pulisya sa isla it Boracay matapos nga pila sa mga pulis nga naka-assign kara hay nakaangkon it close contact sa sangka pasyente nga tinamaan it COVID-19.
Suno kay Malay Mayor Frolibar Bautista nga kapin sa 80 nga pulis ro ginpaidaeum sa swab test ag pila sa mga raya hay gin-quarantine.
Sa makaron hay ginahueat pa ro resulta it andang test.
Ginpahayag dugang nga ginapatigayon makaron ro disinfection ag contact tracing sa nasambit nga estasyon it pulisya agud nga matapna ro pagkalhit it virus.
Indi pa matumod kon hin-uno magabalik ro normal nga transaksyon sa nasambit nga police station.
Angot kara, gin abisuhan ro mga kliyente nga idtu anay makipag transaksyon sa anuman nga kinahangean nga police assistance sa andang sub-station sa Barangay Poblacion sa banwa it Malay.
Samtang, ro banwa it Malay kaibahan ro isla it Boracay hay may kabilugan nga 320 nga kaso it COVID-19 eakip ro 6 nga bag-ong nailistang kaso.
Nakapaidaeum pa sa surgical lockdown ro zone 5 it Barangay Manocmanoc nga nag-umpisa ko Mayo 1 ag ginaeauman nga magatapos sa Mayo 14.
Raya eon ro ikaywang beses nga may ginpatuman nga lockdown sa nasambit nga barangay bangud sa nagatinaas nga kaso it deadly virus.
Angot kara, padayun nga naga apela si Mayor Bautista nga seryosohon ro ginapatuman nga minimum public health standards para sa kaeowasan it tanan.
