KALIBO, Aklan—Matapos nga magbaeatuhan it andang tagsa-tagsa ka mga version agud nga madepensahan ro andang kaugalingon, nag-atubang sa pinakaunang kahigayunan pamaagi sa Bombo Radyo sanday Barangay Kapitan Riza Relojo it Brgy. Cupang, Banga ag ro anang barangay treasurer nga si Lourdes Zambrona.
Raya ro unang beses nga nataw-an it tiyansa ro daywa nga makapag-istorya matapos nga mag-eupok ro isyu angot sa andang personal nga paggamit it kapin sa P939,000 pesos nga pundo it barangay.
Sa andang pag-atubang, todo-depensa si barangay treasurer Zambrona may kaangtanan sa alegasyon ni Kapitan Relojo nga kaibahan imaw sa mga nagpanginpueos sa pundo it barangay nga gina-alegar nga gin-withdraw nandang daywa ni Kapitana agud nga gamiton anay sa andang personal nga kinahangeanon.
Gin-insister pa ni Zambrona nga si Kapitan permi ro nagapamilit kana nga mag-isyu it cheque.
Nagpanindugan man raya nga owa imaw it dapat nga bayaran sa naduea nga pundo it andang barangay bangud owa sigon imaw it may ginbo-oe.
Sa pihak nga parte, uman nga ginpamilit ni Barangay Kapitan Riza Relojo it Brgy. Cupang, Banga nga daywa sanda ni Barangay Treasurer Lourdes Zambrona nga naggamit it pondo it barangay apang nagpasugot eamang sigon imaw nga kana ipangaean ro tanan nga cheque.
Samtang, matapos man nga mabatian ro palutsada it magtimbang nga parte, ginpahayag ni Barangay Kagawad Emily Rentino nga magapati eamang imaw sa kung sin-o ro magpakita it nagakaigo nga dokumento.
Dugang pa kara nga sa makarun hay nag-abot eun sa negative zero ro budget it andang barangay.
Sa makarun hay apektado man ro andang mga proyekto partikular ro pilang ka mga programa para sa mga pomoeuyo.
