KALIBO, Aklan–Nagapati si Aklan first district board member Nemesio Neron nga kinahang-ean nga maklaruhan ro isyu it sinkholes sa isla it Boracay.
Suno kana, mas mayad nga nadetect raya it mas temprano agud masayuran kon anu ro mga mitigationg actions nga pwede nga himuon.
Apang, kinahang-ean sigon nga makit-an it lokal nga gobyerno it Malay ro actual study it Department of Environment and Natural Resources-Mines and Geosciences Bureau (DENR-MGB) Region 6 para sa dugang nga paghaeong ag pag-amlig sa isla.
Mas makapamayad nga pungkuan it mga natungdan ro nasambit nga isyu bangud nga posibleng makaapekto raya sa uman nga pagbangon it industriya it turismo.
Posible suno kana nga may mga turista nga inde eon mag-adto sa Boracay bangud sa kahadlok sa mga napabalitang sinkholes.
Bangud kara, kinahang-ean ro maid-id nga pag-istudyo it DENR-MGB ag makapaguwa sanda it kongkretong datos angot sa ginasugid nga ginatos ka mga nadiskubrehang sinkholes sa Boracay.
