KALIBO, Aklan—Nakipagpueong si Italian Ambassador to the Philippines sa pilang opisyales it banwang Malay sa isla it Boracay ko nagtaliwan nga adlaw it Sabado.
Suno kay Malay Mayor Frolibar Bautista, kaibahan nandang nagtambong sa nasambit nga pueong ro grupo it mga Italyano nga residente it Boracay, Malay PNP ag Philippine Coastguard (PCG)-Aklan.
Suno kana, naging madinaeag-on ro andang pag-istorya sa tunga ni Italian Ambassador to the Philippines Giorgio Gugliemo matapos karang sikyaron ro kahimtangan ag seguridad it andang mga pumueyo nga presenteng naga-istar sa isla.
Ginpahayag dugang nga namitlang man sa pueong ro negosasyon angot sa planong pagduso it direct flight halin Rome, Italy paadto it Manila.
Nagaeaum man sanda nga raya hay mapasugtan bangud nagapati sigon ro Ambassador nga mabahoe ro maibulig kara sa pag-umwad it turismo it Pilipinas.
Kaangot kara, malipayon man nga ginpakigbahin ni PLTCOL Jonathan Pablito nga owa it nai-record nga krimen nga ginakaeakipan it mga Italian nationals sa sueod it haeos bilog nga dag-on karang assignment sa isla.
Samtang, ginpahayag man sigon it Ambassador nga ro mga Filipino ro may pinakamataas nga populasyon sa nasyong Italy.
