KALIBO, Aklan—Igapatigayon hinduna nga gabi-e ro dag-onan nga “Iwag it Kalibonhon”.
Raya ro sambilog man sa sangka aktibidad nga ginadayo it mga pomoeuyo kada pag-abot it nagahieapit nga kapaskwahan sa Kalibo Pastrana Park.
Suno kay Kalibo Mayor Emerson Lachica nga “all set” eun ro pagahimuon opening it Christmas lights sa pihak it ginapangatubang makarun nga pandemya.
Apang raya hay magiging “virtual lighting” eun lang bilang kaparte it ginahimo nga tikang agud malikawan ro pagtieilipon it mga tawo ag malikawan ro pagkalhit pa it COVID-19.
Suno sa facebook post it Vibrant Kalibo, ginkabuligan it lokal nga gobyerno it Kalibo nga matigayon ro simpleng dekorasyon sa Kalibo Pastrana Park ag sa mga karsada bilang pagdumdom nga si Hesus ro sentro it Pasko sa tunga it krisis nga ginapangatubang it bilog nga kalibutan.
Pagahimuon ro virtual lighting hiduna alas-6 it gabi-e Disyembre 1 ag mapamantaw sa mga Facebook Pages: @vibrantlivablegreenerkalibo, @kalibopublicaffairs, KCTV Channel 1 ag 24 ag ACTV Community Channel.
Mag-euwas sa Kalibo, puno eun man it makolor nga Christmas decorations ro municipal hall sa mga banwa it Makato ag New Washington.
Ginbantayan man ro virtual opening of lights sa Provincial Capitol Grounds makarun nga December 8, 2020.
