SHOWBIZ News —- Ginpakita ni Iya Villania ro anang nagabahoe eon nga baby bump samtang nakabakasyon ro bilog nga pamilya sa Isla it Boracay.
Raya ro kauna-unahan nga biyahe it pamilya makaron nga dag-on.
Suksok ni Iya ro anang swimwear nga kapareho man ro kolor sa anang daywang unga nga eaeaki nga sanday Primo ag Leon samtang ro unga nga babaye nga si Alana hay nakasuksok mat-a it colorful nga bathing suit.
Aminado ro aktres nga maskin sa picture taking it andang pamilya hay mabudlay kapareho it andang pagbiyahe it mister nga si Drew Arellano kaibahan ro tatlong unga nga puro maintok pa.
Sa makaron hay excited eon ro mag-asawa sa andang baby No. 4.
Ginpahayag ni Iya nga medyu nabudlayan imaw makaron sa anang pagnabdos bangud sa grabeng naexperiensiyahan nga morning sickness, kun sa siin ginaturo nga posibleng bangud sa anang edad.
Nauna eon nga gin-anunsyo it mag-asawa ro pagnabdos ni Iya ko Enero pinaagi sa andang vlog.
