KALIBO, Aklan — Arestado ro sangka jail guard ag sangka inmate matapos sigon nga mabak-ean it ilegal nga droga sa guwa it Aklan Rehabilitation Center (ARC) sa Barangay Nalook, Kalibo, Aklan.
Ginkilaea ro mga suspek nga sanday Clarymel Melgarejo, 28, jail guard it ARC ag residente it Barangay New Buswang, Kalibo, Aklan ag Rona Espino, 41, tubong Concepcion, Iloilo ag presenteng nakakulong sa nasambitang kulungan bangud sa kasong pag-eabag sa Republic Act 9165 ukon Comprehensive Dangerous Drugs Act of 2002.
Suno kay P/CInsp. Frenzy Andrade, hepe it Provincial Drug Enforcement Unit (PDEU)-Aklan, pilang buean eon nga under surveillance nanda ro mga suspek nga ginaturong supplier it shabu sa sueod it kulungan.
Nakumpiska sa jail guard nga babaye ro daywang sachet it suspected shabu, P2,000 nga marked money ag sangka motorsiklo.
Depensa kara nga gin-iskortan eamang nana si Espino sa pag-ayos it pilang mga kinahang-eanong dokumento para sa anang paglaya.
Nakibot sigon sanda bangud kat maeapit eon sa ARC hay bigla tinambangan ng mga operatiba.
Gin-insister man it inmate nga puro planted ro narekober nga shabu ag kwarta nga pilit sigon ginasuksok sa boesa it pantalon ni Melgarejo.
Kasalukuyang nakakulong ro daywang suspek sa Kalibo Police Station pati ro mga ebidensiyang nabueo kanda para dugang nga imbestigasyon.
