KALIBO, Aklan—Nag-umpisa eon sa puwesto bilang bag-ong Jail Warden it Bureau of Jail Management and Penology ukon BJMP-Aklan si Jail Inspector Joel Laquihon epektibo Enero 8, 2021.
Ginbayluhan ni Laquihon ro dating District Jail Warden nga si Jail Inspector Eduardo Beñares ag naka-destino makaron sa Iloilo District Jail bilang Assistant District Jail Warden.
Antes nga na-assign sa Aklan, si Laquihon hay naghalin sa Culasi District Jail.
Ro mandu hay ginpaguwa ni Jail Senior Superintendent Gilbert Peremne, deputy regional director for administration it BJMP-6 maskin nga owa pa it kumpirmasyon ro national headquarters angot sa relief order ni Benares.
Madumduman nga nauna eon nga gin-aprubahan ko Disyembre 15 it regional office ro rekomendasyon nga pahalinon si Beñares sa BJMP aklan samtang ginapaidaeum sa imbestigasyon.
Nag-ugat ro isyu sa nasambit nga jail warden matapos nga sangka anonymous text message ro nabaton it BJMP-6 ko nagtaliwan nga Nobyembre 29, 2020 nga gina-alegar nga ginhinyu kara ro anang naka-lock-in duty nga jail personnel nga ihatud ro anang hilong nga civilian nga bodyguard sa sangka bus terminal paagto it Iloilo.
Mag-eowas kara, nagapangatubang pa imaw sa reklamong sexual harassment it babayeng katrabaho.
