Mabaskog nga magnitude 6.9 ro umuyog sa naaminhan nga parte it Japan, adlaw it Huwebes, apang owa it ginpaguwa nga tsunami warning ag owa man it napabalitang namatay ukon mabahoe nga kahalitan.
Ro linog hay natabu bandang alas-7:30 it agahon sa dagat maeapit sa Iwate Prefecture sa isla it Honshu, nga may daeum nga ginaboeobanta nga 50 kilometro suno sa Japan Meteorological Agency.
Nabatyagan ro pag-uyog sa Tokyo nga masobra sa 700 kilometro ro eayo halin sa episentro. Sa Aomori Prefecture, nga pinakamaeapit sa episentro, nailista ro kabaskog it pag-uyog sa level nga “upper 6” sa Shindo intensity scale it Japan, sangka lebel nga nagatuga it grabeng pag-uyog, kun sa siin, mabudlay eon nga magtindog nga owa it suporta ag pwedeng matumba ro mga kagamitan ag mabasag ro mga bintana.
Insigida nga ginsuspinde it East Japan Railway ro operasyon it Tohoku Shinkansen bullet train sa tunga it Sendai ag Shin-Aomori para sa inspeksyon it kaeowasan.
May pilang expressway sa Aomori nga temporaryong ginsarado para sa pag-usisa. Sa pihak kara, nagapabilin nga normal ro daeagan it trapiko sa Hachinohe City ag nagagana gihapon ro mga traffic lights.
Nagpahayag si Chief Cabinet Secretary Minoru Kihara nga owa pa it impormasyon angot sa namatay ag padayun nga gina-monitor ro sitwasyon.
Ginpahayag man it Nuclear Regulation Authority nga owa it nakitang abnormalidad sa mga nuclear power plant sa Onagawa, Higashidori, ag Tomari sa Hokkaido.
Nag-mandu si Prime Minister Sanae Takaichi sa mga ahensya it gobyerno nga makipagbueuligan sa lokal nga gobyerno ag nagpanawagan sa mga residente nga magpabilin nga alerto sa posibilidad it mga aftershocks.
Ro Japan hay sambilog sa mga pinaka-seismically active nga nasyon sa kalibutan, nakapuwesto sa ibabaw it ap-at nga nagapangunang tectonic plates sa Pacific “Ring of Fire.”
Ginaboeobanta nga haeos 18 porsyento it mga mabaskog nga linog sa bilog nga kalibutan hay nagakatabu sa Japan.
