KALIBO, AKLAN—Eubus ro kasubo nga nabatyagan it sangka pet lover nga si Albert Manalo it Oyotorong Street, Brgy. Poblacion, Kalibo matapos nga namatay ro anang alagang ayam nga Japanese Spitz, pitong dag-on ag ginpangaeanang Nikki.
Suno kay Manalo, napamahae imaw it husto sa anang alaga kon siin nauna eon sigon raya nga gin-abutan it anang monthly period nga nagbuhay it sang buean.
May kaangtanan kara, anang ginpakamayad nga ipakonsulta sa beterinaryo kon siin ginresetahan sigon raya it mga bueong.
Makataliwan ro sang buean suno kana hay uman nga nagmasakit ro anang alaga hasta nga inde eon raya makatindog ag may nagaguwa nga gatas ag dugo sa anang suso.
Bangud kara, uman nga ginpakonsulta ro ayam sa anang beterinaryo hasta nga ko ulihi hay uwa eon naagapan ag ko Disyembre 17 hay natigayon eon raya nga binawian it hueam nga kabuhi.
Suno sa ana nga doktor, atake sa tagipusuon ro naging kabangdanan it hinali nga kamatayon ni Nikki.
Samtang, agud nga mataw-an it disenteng lamay, ginpaobrahan raya it kahon kon siin imaw nakahaya nga ginapalibutan it kandila ag bueak kamana man nakahaom eon ro anang panchon sa terrace mismo it anang baeay.
Si Manalo hay nauna eon sigon nga naeowas it anang sambilog pang alaga nga ayam matapos nga ginpukaw sigon raya kat nataeopangdan nga nagakasunog eon ro andang ceiling fan rason nga naagapan insigida ro hana nga pagkasunog it andang bilog nga baeay.
Si Nikki hay nakataeana nga iga-eobong sa Enero 23 pagkatapos it Kalibo Ati-atihan Festival.
