KALIBO, Aklan—Dismayado ro mga drivers it mga pampasaherong jeepney sa probinsiya it Aklan bangud nga owa pa nanda napanipuslan ro gin-anunsyo nga daywang piso nga dugang nga pamasahe.
Suno kay Chris Toria, driver it jeep nga may biyaheng Caticlan-Kalibo vice versa nga indi sanda pwedeng makapanukot it bag-ong pamasahe nga owa it updated nga fare matrix ukon taripa halin sa Land Transportation Franchising and Regulatory Board ukon LTFRB.
Maskin sigon nga naging epektibo eon ko Hulyo 1 ro fare increase nga daywang piso sa mga jeep sa bilog nga nasyon hay indi pwedeng magpapanaog it dugang nga sukot kon owa sanda it bag-ong taripa.
Sa pihak nga parte, gindugang pa ni Toria nga maskin nga may naka-abang nga rollback hin-aga nga adlaw it martes hay bukon sa gihapon it bastante bangud sa sunud-sunod nga pagpataas it presyo it produktong petrolyo ko nagtaliwan nga mga domingo.
Mag-eowas kara, problema man nanda ro mga nagabiyahe nga van nga nakikipag-kompetensiya kanda bukon eamang sa ginasakay nga pasahero kundi maskin sa mga kargada nga bukon eon it sakop it andang prangkisa bangud nga ro andang saeakyan hay intended eamang sa mga turista.
Plano man nanda nga idangop ro andang problema kay Kalibo mayor Juris Sucro agud nga matabog ro mga van nga naka parking sa kahabaon it Roxas Avenue nga makabig nga iligal bangud nga kapareho nanda , dapat hay nagapila ag nagahueat man sanda it pasahero sa andang natungdan nga terminal.
Maabu man sigon kanda ro nagpundo eon it pagbiyahe bangud sa presenteng sitwasyon.
Sa kabilugan nga 36 nga units hay 12 eon lang ro nagabiyahe makaron.
