KALIBO, Aklan — Ginakabig it mga kagrupo sa banda nga “5601” ro 15 anyos nga si Jhuros Flores nga andang savior .
Raya hay bangud nga pilang adlaw antes ro anang pagka-eumos sa Aklan River nga sakop it Brgy. Polo, Banga hay ginasugid nga nagdamgo raya it maeain .
Ginsugid sigon kara sa anang kaklase nga nagdamgo imaw nga samtang nagapa-agto sa “outing” ro andang grupo hay nadisgrasya ro andang ginasakyan ag nahueog sa bangin kun sa siin owa it sin-o man ro nabuhi kanda.
Angot kara , ginkumpirma ni Aims Stanley San Jose , tumandok it Brgy. Bacan, Banga ag presenteng nagatrabaho sa Los Angeles California ag tag-ana it bandang “5601” nga nagaplano kunta ro anang mga miyembro nga maga-excursion ko nagtaliwan nga Pebrero 1 bangud sa madinaeag-on nga pagpasakop ag pagpatik sa nagtaliwan nga selebrasyon it Ati-Atihan festival.
Apang owa eon lang ginpadayun it grupo matapos ro natabu kay Jhuros.
Maskin sigon ro anang mga kabanda hay nakibot man sa nasambit nga rebelasyon nga anda eamang nga nasayuran sa kasagsagan it ginkasa nga search and retrieval operation.
Owa sigon it may naistorya kanda si Jhuros angot sa anang maeain nga damgo.
Posible suno kana nga naging patimaan ro damgo ag ro natabu kay Jhuros agud nga mailikaw sanda sa anuman nga peligro.
Sa pihak nga parte, ginsaysay ni San Jose nga grabe ro kakibot ag kasubo nga andang nabatyagan sa natabu sa binatilyo.
Mabuot sigon raya nga klase it unga, mahugod ag masaligan kapin kon naga-praktis ro andang banda.
