BANGA, Aklan—Nagapabilin nga missing si Jhuros Flores, ro grade 10 student nga naeomos sa Aklan river nga sakop it Brgy. Polo, Banga sa ika-an-om nga adlaw it search and retrieval operation halin kat natabo ro insidente ko Enero 29, 2025.
Sa pihak it pagtinguha it nagkaeain-eain nga emergency responders it municipal disaster risk reduction management council sa bilog nga probinsya it Aklan, uwa gihapon nakit-an ro nakahamtangan it binatilyo rason nga maabo eon ro nagguwa nga mga espekulasyon kaibahan eon ro mga pagban-aw it nagkaeain-eain nga faith healer maghalin sa nagkaeain-eain nga lugar.
Angot kara, nagta-o it anang opinion ag suhestyon si Engr. Val Teodosio, ro project development officer it Aklan Environment and Natural Resources Office ukon AKENRO nga ginapatihan kara nga posibleng nasangit sa mga structure sa lugar si Jhuros rason nga uwa eon imaw nakabutwa.
Mas makapamayad suno kana kon maghimo it tikang nga maidivert ro tubi pinaagi sa mga pagagamiton nga heavy equioment agud nga magnabaw sa lugar kon sa siin imaw naeomos agud nga makit-an ro mga structures.
Ginapatihan dugang nana nga uwa eon imaw nakaeapos sa estaka it Brgy. Sigcay.
